GRONDSLAGFASE

Eversdal het ‘n baie spesifieke visie en missie waarna gestreef word. Die akademiese benadering vloei dus daaruit voort.

Elke kind wat sy of haar voetjie oor die drumpel van die Laerskool Eversdal sit, is uniek en spesiaal en word daarom as ‘n individu behandel. Dit is elke kind se reg om binne ‘n veilige omgewing en stimulerende atmosfeer, intellektueel, emosioneel, fisiek en sosiaal te ontwikkel en persoonlik te groei.

Die Nasionale Kurrikulum word gevolg, maar die inhoud word om die leerders se belangstellings en leefwêreld gebou. In die klaskamer is die onderwyser die gids wat die leerders se natuurlike nuuskierigheid gebruik om die leerstof te ontsluit. Die onderwyser is die bron van kennis en verskaf die vaardighede om nuwe kennis te verwerf. Hierdie kindgesentreerde aanslag lei tot innerlik gemotiveerde leerders wie se natuurlike nuuskierigheid ingespan word om hul passie vir leer te  stimuleer. Aktiewe leer vind dus op ‘n ontspanne manier plaas. Hulle word aangemoedig om binne hierdie leeromgewing met selfvertroue te kan ontdek, kanse te waag en hul opinies te lug. Tegnologie, soos rekenaars, iPads en witborde, word nie as ‘n toevoeging tot  die akademie gesien nie, maar as middels om leer te verryk en leerstof toe te lig. Leerders leer vaardighede aan terwyl hul met die kurrikulum omgaan.

Die akademie is nou verweef met die skool se waardeprogram. Gesindheid, vaardighede en waardes loop soos ‘n goue draad deur al die vakke wat aangebied word.

Kritiese denke, probleemoplossingsvaardighede en respek word daagliks sonder omhaal op alle gebiede geïntegreer om te verseker dat ons kinders hulself eendag in die samelewing sal kan handhaaf.